Professor Aida İmanquliyevanın yaradıcılığı haqqında kitabın təqdimatı
2017-ci il dekabrın 6-da Belqrad Universitetinin Filologiya Fakültəsinin Şərqşünaslıq kafedrasının kitabxanasında AMEA-nın müxbir üzvü, professor Səlahəddin Xəlilovun Azərbaycanın görkəmli şərqşünas alimi Aida İmanquliyevanın yaradıcılığı haqqında qələmə aldığı “Şərq və Qərb problematikası kontekstində romantik poeziya” kitabının serb dilinə tərcüməsinin təqdimatı keçirilib. Azərbaycanın Serbiyadakı Mədəniyyət Mərkəzinin direktoru, Novi Sad İncəsənət Akademiyasının professoru Zərifə Əlizadənin serb dilinə tərcümə etdiyi kitabın təqdimat mərasiminə Belqrad Universitetinin müəllim və tələbə heyətinin, Serbiyadakı diplomatik korpusun, Serbiya Xarici İşlər Nazirliyinin, serb ictimaiyyətinin və ziyalılarının təmsilçiləri toplaşıblar.
Tədbiri giriş sözü ilə açan prof.Zərifə Əlizadə təqdimatın keçirilməsinə verdiyi dəstəyə görə Belqrad Universitetinin Filologiya Fakültəsinə öz təşəkkürünü bildirərək bu kimi tədbirlərin xalqlarımızın bir-birini daha yaxından tanımasına xidmət etdiyini vurğulayıb. O, ərəb ədəbiyyatının Azərbaycanda ilk araşdırmaçılarından olan professor Aida İmanquliyevanın yaradıcılığı haqqındakı kitabın Serbiyanın şərqşünas alim və tədqiqatçıları üçün də maraq doğuracağına inamını ifadə edib.
Tədbirdə çıxış edən kitabın müəllifi Səlahəddin Xəlilov həm Qərbin, həm də Şərqin vətəndaşı sayıla biləcək professor Aida İmanquliyeva haqqında kitabın Qərb və Şərqin qovuşduğu Belqrad şəhərində təqdim edilməsinin təsadüfi olmadığını bildirib, Avropada və Amerikada yaşayan, lakin ruhən şərqli olan və Şərqi gözəl bilən ərəb mühacirlərinin yaradıcılığını tədqiq edən A. İmanquliyevanın araşdırmalarının yeni bir elmi istiqamətin – Şərq və Qərbin inteqrasiyası prosesinin öyrənilməsinə yönəldildiyini qeyd edib.
Tədbirdə kitab haqqında Belqrad Universitetinin Filologiya Fakültəsinin Şərqşünaslıq kafedrasının professorları Anjelka Mitroviç, Ema Milkoviç və Miryana Marinkoviç çıxış edərək təqdim olunan kitabın Azərbaycan və Serbiya arasında elmi əməkdaşlığa yeni bir töhfə olduğunu, eyni zamanda sivilizasiyalar arasında dialoqun mühüm olduğu müasir dünyada A.İmanquliyevanın yaradıcılığının öz aktuallığını qoruyub saxladığını vurğulayıblar.
